संयुक्त राष्ट्र संघका महासचिव एन्टोनियो गुटेरेसले नेपालको औपचारिक भ्रमण गर्ने भएका छन् । प्रधानमन्त्री पुष्पकमल दाहालको निमन्त्रणमा महासचिव गुटरेस असोज २६ गते काठमाडौं आउन लागेका हुन् । महासचिव गुटेरेस नेपाल भ्रमणपछि असोज २९ गते नेपालबाटै चीन जाने कार्यक्रम छ। नेपाल भ्रमणका क्रममा महासचिव गुटेरेसले राष्ट्रपति, प्रधानमन्त्री, तथा बिभिन्न राजनीतिक दलका नेताहरुसँग भेट गर्ने कार्यक्रम रहेको छ ।

परराष्ट्र मन्त्रालय स्रोतका अनुसार द्वन्द्वकालीन मुद्दाको किनारा लगाउन राजनीतिक दलहरूलाई सकस भइरहेका बेला महासचिवको यो भ्रमण बिशेष हुन सक्ने बताइन्छ । स्रोतका अनुसार महासचिव गुटेरेसले द्वन्द्वकालका पीडितहरूसँग समेत भेट गर्ने कार्यक्रम छ ।

राष्ट्रसंघको महासभामा सहभागी भएका बेला प्रधानमन्त्री दाहालले महासचिव गुटेरेसलाई भेटेर नेपाल भ्रमणको निम्तो दिएका थिए।