एजेन्सी

पाकिस्तानका पूर्वप्रधानमन्त्री तथा पीटीआई पार्टीका प्रमुख इमरान खान भ्रष्टाचार मुद्दामा तीन वर्ष कैद पाएपछि यतिबेला उनि जेलमा छन् । सरकारमा हुँदा उपहार बिक्री गर्दा पाएको रकमबारे जानकारी नगराएको ‘तोषाखाना मामिला’ मा उनलाई इस्लामाबाद जिल्ला अदालतले कैद सजाय र जरिवाना दुवैको फैसला सुनाएको थियो ।

खानलाई यसअघि गत मे ९ मा पनि भ्रष्टाचार मुद्दामै पक्राउ गरिएको थियो । त्यतिबेला पाकिस्तानी सरकार र सेनाविरुद्ध देशभर प्रदर्शन भएको थियो । पाकिस्तानी सेनाको मुख्यालयसहित विभिन्न ठाउँमा खानका कार्यकर्ताले आक्रमण गरेका थिए । सरकारलाई प्रदर्शन रोक्न हम्मेहम्मे परेको थियो । गत शनिबार लाहोरस्थित निवासबाट दोस्रो पटक पक्राउ पर्नुअघि उनले आफ्नो पक्राउको विषयमा चुप नबस्न सर्वसाधारणलाई अपिल गर्दै भिडियो सन्देश सार्वजनिक गरेका थिए ।

खानको सजायबारे माथिल्ला अदालतबाट पनि यही फैसला सदर भएमा उनी आगामी ५ वर्षका लागि चुनाव लड्न अयोग्य साबित हुनेछन् । त्यसो भएमा खानको राजनीतिक भविष्य अन्त्यको संघारमा पुगेको विश्लेषण गर्न थालिएको छ । कुनै समय पाकिस्तानको क्रिकेट टिमका कप्तान समेत रहेका ७० वर्षीय खान उत्तिकै लोकप्रिय भने छन् । सन् १९९६ मा पीटीआई स्थापना गरेर खान राजनीतिमा प्रवेश गरेका थिए । पीटीआईले सन् २०१८ मा ११६ सिट जितेपछि खान प्रधानमन्त्री बनेका थिए । तर, सन् २०२२ अप्रिलमा अविश्वास प्रस्तावमा हारपछि उनले सत्ता गुमाउनुपरेको थियो ।