चन्द्रमाको एक क्रेटरलाई अब सगरमाथा आरोहण सफल गर्ने प्रथम महिला पासाङ ल्हामु शेर्पाको नामबाट चिनिने भएको छ । अन्तर्राष्ट्रिय खगोलिय संघको ग्रह प्रणाली नामाकरण समुहले चन्द्रमाको एक क्रेटरलाई ल्हामु नाम स्किृत गरेको छ ।

अमेरिकी भूगर्भ सर्वेक्षणले गरेको घोषणा अनुसार, सगरमाथा आरोहरण गर्ने प्रथम महिलाको सम्मानार्थ चन्द्रमाको दक्षिण धु्रवको एक महत्वपूर्ण पर्वतको शिखरमा रहेको क्रेटरलाई ल्हामु क्रेटर नामाकरण गरेको छ । अन्तराष्ट्रिय खगोलिय संघले पासाङ ल्हामुको सम्मान र उनको अतुलनिय उपब्धि भनेको छ । नेपालस्थित अमेरिकी दूतावासले प्रेस विज्ञप्ती मार्फत पासाङ ल्हामुको सम्मानले नेपाली महिलाहरुका लागि उच्च सफलताको बाटो खोलिदिएको र विश्वभर रहेका अनगिन्ती महिलाहरुलाई सम्मान पुगेको भनेको छ ।

पासाङ ल्हामुको सम्मानमा चन्द्रमाको एक महत्वपूर्ण पर्वतको नाम राखिने भएपछि अन्तराष्ट्रिय संचारमाध्यमहरुले यो समाचारलाई महत्वका साथ छापेका छन् । यो समाचारसँगै आम नेपालीहरुले खुसी व्यक्त गरेका छन् । मेरिल्याण्ड राज्य सभाका सांसद डाक्टर ह्यारी भण्डारीले पासाङ ल्हामु शेर्पाको सम्मानले विश्वभर रहेका नेपालीहरुको शिर उचो भएको बताए, सांसद डाक्टर भण्डारीले भने, यो उच्च सफलताले विश्वभरका महिला दिदी बहिनी र आम नेपालीको सफलतासँग जोड्दछ ।

गैरआवासीय नेपाली संघ अमेरिकाका प्रवक्ता प्रोफेसर डाक्टर राजन पन्तले पासाङ ल्हामु शेर्पाको सम्मानमा अन्तराष्ट्रिय खगोलिय संघले गरेको सम्मानले आज विश्भर छरिएर रहेका नेपालीहरुको शिर उचो भएको प्रतिकृया दिए ।