संसदीय छानबिन विशेष समितिले कार्यविधि बनायो

सर्वसम्मतरुपमा कार्यविधि पारित

न्यूजपाली संवाददाता सोमबार, ३ असार २०८१

सहकारीको रकम दुरुपयोग सम्बन्धमा छानबिन गर्न गठित संसदीय छानबिन विशेष समितिले कार्यविधि बनाएको छ । समितिको बैठकले सर्वसम्मतरुपमा कार्यविधि पारित गरेको समिति सदस्य लेखनाथ दाहालले राससलाई जानकारी दिएका छन । “समितिका सदस्यहरुबीच प्रस्तावित कार्यविधिमा छलफल भई सर्वसम्मतिले पारित भएको छ । सोही आधारमा अनुसन्धान अघि बढ्नेछ”, उनले भने ।

समिति सदस्य शिशिर खनालका अनुसार पहिलो चरणमा सम्बन्धित मन्त्रालय र विभागसँग छलफल गरिनेछ । त्यसका लागि आगामी मङ्गलबारका लागि बैठक बोलाइएको छ । बैठकमा भूमि व्यवस्था, सहकारी तथा गरिबी निवारणमन्त्री, सहकारी विकास बोर्ड पदाधिकारी लगायतलाई छलफलका लागि डाकिएको छ । कूल २९ वटा सहकारीको लिखित प्रतिवेदनसहित छलफल हुने जनाइएको छ ।

कार्यविधि पारित भएसँगै मङ्गलबारदेखि नियमित काम सुरु हुने जनाइएको छ । गत जेठ १५ गते गठन भएको समितिमा नेपाल कम्युनिष्ट पार्टी एमालेका सांसद सूर्य थापा सभापति छन । नेपाली कांग्रेसबाट सह–महामन्त्री बद्रीप्रसाद पाण्डे र केन्द्रीय सदस्य एवं सांसद ईश्वरी न्यौपाने, एमालेकी सरिता भुसाल, नेपाल कम्युनिष्ट पार्टी माओवादी केन्द्रका माओवादीका लेखनाथ दाहाल, राष्ट्रिय स्वतन्त्र पार्टी रास्वपाका शिशिर खनाल र राष्ट्रिय प्रजातन्त्र पार्टी राप्रपाका ध्रुवबहादुर प्रधान सदस्य छन ।