शुक्रबार न्युयोर्कको चिसो मौसमका बीच नेपालका चर्चित हाँस्य कलाकारहरुले एक कार्यक्रम गरेका छन । नेपालका चर्चित आठ हास्य कलाकारहरुले नेपाली राजनीतिदेखि एनआरएनए सम्मको बिषयलाई व्यंग्य गरेर न्यूयोर्कमा जम्मा भएका नेपालीहरुलाई हँसाए ।

नेपालका हास्य कलाकारहरु सन्दिप क्षेत्री, भरतमणी पौडेल, सुमन कार्की, कैलाश कार्की, विष्णुप्रसाद गौडेल, सजन श्रेष्ठ, सन्तोष थापा र सुमन कोइरालाले सुनतस्करी, राजनीतिक नेताहरु, एनआरएनए लगायतका गतिविधि समेटेर दर्शकहरुलाई मनोरञ्जन गराए ।

विदेशमा टोलै पिच्छे खुलेका संघ सस्थादेखी एनआरएनएका गतिविधिहरुको प्रस्तुती कार्यक्रममा सुन्न लायक थियो । नेपालमा बाढी, पहिरो वा भूकम्पजाँदा विदेशमा बस्ने नेपालीहरुको गर्ने सहयोग पनि कालकारहरुले बिषय बनाएर प्रस्तुत गरेका थिए ।

‘अब हाँस्छ अमेरिका’ नाम दिइएको कार्यक्रमको नेतृत्व विनोद अधिकारी गरेका छन । शुक्रबार सम्पन्न न्युयोर्कको कार्यक्रमको नेतृत्व विनिता तामाङ र मनिता गुरुङले गरेका थिए । कार्यक्रममा न्युयोर्क राज्य संसदका सिनेटर जोन लिउको समेत उपस्थीति थियो । राज्य सांसदहरु जोन लिउ, स्टेभन रागा र जेनिफर राजकुमारका तर्फबाट हाँस्य कलाकारहरुलाई सम्मानपत्र समेत प्रदान गरिएको छ ।

नर्थ क्यारोलिनादेखि सुरु भएको ‘अब हाँस्छ अमेरिका’ यात्रा झण्डै डेढ दर्जन सहरमा आयोजना हुने जानकारी दिइएको छ । न्यूयोर्कमा भएको कार्यक्रमको संचालन संचारकर्मी सुरेश शाहीले गरेका थिए ।