राष्ट्रिय स्वतन्त्र पार्टीका सांसद मनिष झाले धर्म र सम्प्रदाय भन्दा माथि उठेर देशको झन्डा बोक्नुपर्ने धारणा व्यक्त गरेका छन् । पछिल्लो समय देशमा धर्म र सम्प्रदायबीच दंगा निम्त्याउने दुष्प्रयास भइरहेको तर्फ संकेत गर्दै सांसद झाले जनप्रतिनिधि, राज्य संयन्त्र र राजनीतिक दलहरू सबै सचेत हुनुपर्ने बताएका छन् ।

प्रतिनिधिसभाको बिहीबारको बैठकमा सांसद झाले धार्मिक दंगामा भोटको राजनीति नगर्न समेत आग्रह गरेका छन् । सामाजिक संजालमा मित्थ्या सन्देश राखेर जातीय र धार्मिक दंगा फैलाउन खोजिएको सांसद झाको भनाइ छ ।

सांसद झाले त्यस्तो भ्रामक सन्देशको पछाडि जनप्रतिनिधि पनि लाग्ने गरेको भन्दै सचेत गराए । धार्मिक द्वन्द्वमा भोटको राजनीति गर्न नहुने पनि उनले आग्रह गरेका छन् । रास्वपाका नेता समेत रहेका झाले भने, केही वर्ष यो देशमा हामीले दलको झन्डा बोक्यौँ, त्यसपछि हामीलाई सम्प्रदायको झन्डा बोक्न सिकायो, अहिले धर्मको झन्डा बोक्न सिकाउँदैछ तर कुनैपनि पुस्तालाई हामीले देशको झन्डा बोक्न सिकाएनौँ ।