काठमाडौ । नेपाली कांग्रेसले संसदमा पेस गरिएको शिक्षा सम्बन्धी विधेयक परिमार्जन गर्न प्रतिबद्धता जनाएको छ । सरोकार वालाहरुसँगको छलफलमा कांग्रेसले ६ बुँदे सहमति सहित शिक्षकहरुको मागलाई सम्बोधन हुने गरी विधेयक परिमार्जन गर्न प्रतिबद्धता जनाएको हो ।

छलफलमा विभिन्न २० वटा संघ संस्थाहरुले आफूहरुको माग सम्बोधन हुनेगरी विधेयक परिमार्जन गर्न कांग्रेस नेताहरुको ध्यानाकर्षण गराएका थिए । पार्टीको तर्फबाट सरोकारवाला निकायका मागलाई सम्बोधन हुनेगरी विधेयक परिमार्जन गर्न प्रतिबद्धता जनाइएको कांग्रेस संसदीय दलका प्रमुख सचेतक रमेश लेखकले जानकारी दिएका छन् ।

प्रमुख सचेतक लेखकले भने, शिक्षाको क्षेत्रमा काम गरिराखेका २० वटा संस्थाका धारणाहरु सुन्ने अवसर हामीले प्राप्त गरेका छौं, र भोलि १ बजे हामी विशेषज्ञहरुसँग बसेर छलफल गर्छौं । सरोकारवाला निकायहरुले भने राहत शिक्षक र बाल विकासका शिक्षकहरुको माग पनि सम्बोधन हुने गरी विधेयक संसदबाट पारित गराउन कांग्रेस नेतृत्वलाई सचेत गराएका हुन । सबै शिक्षकहरुले फेरि आन्दोलन गर्नु नपर्ने गरी विधेयक संशोधन गर्न नेताहरुको ध्यानाकर्षण गराइएको नेपाल शिक्षक राष्ट्रिय महासंघकी अध्यक्ष कमला तुलाधरले जानकारी दिएकी छन् ।