चीनको हाङ्जाओमा १९ औं एसियाली खेलकुद प्रतियोगिता औपचारिक रुपमा सुरु भएको छ । चिनियाँ राष्ट्रपति सी चिनफिङले शनिबार १९औं एसियाली खेलको औपचारिक रुपमा उद्घाटन गरेका हुन् ।

उद्घाटन समारोहमा नेपालका प्रधानमन्त्री पुष्पकमल दाहालसहित एसियाका विभिन्न सरकार तथा राष्ट्र प्रमुखहरूको उपस्थिति थियो । उक्त प्रतियोगिता २३ सेप्टेम्बरमा सुरु भई ८ अक्टोबरसम्म चल्नेछ । जहाँ ४५ देशका १२ हजार खेलाडी प्रतिस्पर्धाका लागि पुगेका छन् ।

प्रतियोगितामा ४० खेल समावेश गरिएका छन् । र त्यसमा ४ सय ८१ स्पर्धा समावेश छन् । हाङचउले प्रतियोगिताका लागि भनेर ५४ खेल स्थलमा प्रयोगमा ल्याउनेछ, तीमध्ये १४ केन्द्र नयाँ निर्मित गरिएका हुन् । उद्घाटन स्थलको नाम ‘बिग लोट्स’ पनि छ । र यहीं समापन समारोह पनि आयोजना हुनेछ । प्रतियोगिताकै लागि भनेर १० हजार क्षमताको भव्य तथा सानदार एसियाली भिलेजको पनि निर्माण गरिएको छ ।

२०२२ को सेप्टेम्बरमा तय भएको १९औं एसयाली प्रतियोगिता कोरोना महामारीका कारण अवरुद्ध भई हाल आयोजना गरिएको हो ।

सन् १९५१ मा भारतको नयाँदिल्लीमा पहिलो संस्करणबाट सुरु भएको प्रतियोगिताको यसपल्टको संस्करण यस क्षेत्रको जनसंख्या, अर्थतन्त्रको आकार र भौगोलिक कारणले पनि बृहत् मानिएको छ । उद्घाटन समारोहमा बोल्दै नेपालका प्रधानमन्त्री पुष्पकमल दाहालले चिनियाँ राष्ट्रपति सी चिनफिङलाई उनी अहिलेको समयकै महान र भिजनरी नेता भएको भन्दै प्रशंसा गरेका थिए ।