आज संविधान दिवस २०८०, विभिन्न कार्यक्रम गरी उत्सवका साथ मनाइँदैछ । आजकै दिन २०७२ असोज ३ गते ‘नेपालको संविधान २०७२’  भएको घोषणा भएको थियो ।

यस अवसरमा सरकारी तथा निजी कार्यालय, विदेशस्थित कूटनीतिक नियोग, राजनीतिक दल, नागरिक समाज, संघ संस्था लगायतले विभिन्न कार्यक्रम गरी संविधान दिवस मनाउँदैछन् ।

नयाँ संविधान लागू भएको घोषणासँगै नेपालको अन्तरिम संविधान २०६३ खारेज भएको थियो । संघियता, धर्म निरपेक्षता, समाजवादोन्मुख लोकतान्त्रिक गणतन्त्रात्मक शासन व्यवस्था लगायतका नयाँ व्यवस्था प्राप्त भएको छ ।

यसैबीच संविधान दिवसको अवसरमा शुभकामना व्यक्त गर्दै, राष्ट्रपति रामचन्द्र पौडेलले नेपालको संविधानले सबै प्रकारका विभेदलाई अन्त्य गरेको बताएका छन्। संविधान दिवस तथा राष्ट्रिय दिवसका अवसरमा बधाई तथा शुभकामना व्यक्त गर्दै उनले भने, ‘वर्तमान संविधानले केन्द्रीकृत र एकात्मक राज्यव्यवस्थाद्वारा सिर्जित सबै प्रकारका विभेद र असमानतालाई अन्त्य गर्दै जातीय, भाषिक, धार्मिक, सांस्कृतिक तथा भौगोलिक विविधता युक्त नेपाली समाजलाई बृहत् राष्ट्रिय एकताको सूत्रमा आबद्ध गरेको छ।

राष्ट्रपति पौडेलले नेपालको संविधानले लोकतान्त्रिक गणतन्त्रात्मक शासन व्यवस्थाका माध्यमद्वारा दिगो शान्ति, सुशासन, विकास र समृद्धिको आकाङ्क्षा पूरा गर्ने लक्ष्य राखेको धारण व्यक्त गरेका छन् ।

राष्ट्रपतिले संविधानद्वारा प्रत्याभूत गरिएका राज्यबाट प्राप्त हुने सेवा र सुविधामा सबै नागरिकको समान पहुँच स्थापित गर्नुका साथै आम नागरिकलाई सामाजिक सुरक्षाको प्रत्याभूति प्रदान गर्नुपर्ने उल्लेख गरेका छन्।