काठमाण्डौं । संबिधान सभाका अध्यक्ष तथा पूर्व सभामुख सुवासचन्द्र नेम्वाङको ह्दयघातका कारण निधन भएको छ । एमाले उपाध्यक्ष तथा संसदीय दलको उपनेता समेत रहेका नेम्वाङको मंगलबार बिहान निधन भएको हो । ह्दयघात भएपछि उनलाई त्रिवि शिक्षण अस्पताल पुराएपछी निधन भएको एमाले प्रमुख सचेतक पदम गिरीले न्यूजपालीलाई जानकारी दिए । इलाम बजार सुन्तलाबारमा जन्मिएका नेता नेम्वाङ २०२९ सालदेखी कम्यूनिष्ट राजनीतिमा सक्रिय थिए ।

नेता नेम्वाङ २०३३ सालमा राजदोह्रको मुद्धामा जेल समेत परेका थिए । २०५६ सालको निर्वाचन जितेपछी सार्वजनिक लेखा समितिको सभापति रहँदा तत्कालीन प्रधानमन्त्री गिरीजाप्रसाद कोइरालासँग जोडिएको चर्चित लाउडा काण्ड छानविन गरेर उनि चर्चामा आएका थिए ।

२०५६ सालयता इलामबाट लगातार चुनाव जित्ने नेता नेम्वाङ २०४८ र २०५२ सालमा राष्ट्रिय सभाको सदस्य भएका थिए । उनि मनमोहन अधिकारीको नेतृत्वको पहिलो कम्यूनिष्ट सरकारको कानुन, न्याय तथा संसदीय व्यवस्था मन्त्री समेत भएका थिए ।

जनआन्दोलन २०६२/२०६३ सँगै पुर्नस्थापित संसदका सभामुख बनेका नेता नेम्वाङ २०६३ र २०७० मा पनि इलामबाट चुनाव जितेर संबिधान सभाको सर्वसम्मत अध्यक्ष भएका थिए । संबिधान सभा अध्यक्ष नेम्वाङको निधनपछी प्रधानमन्त्री पुष्पकमल दाहाल, सभामुख देवराज घिमिरे, एमाले अध्यक्ष केपी शर्मा ओली लगायतका शिर्ष नेताहरु त्रिवि शिक्षण अस्पताल महाराजगञ्ज पुगेका छन् ।

सालिन तथा भद्र नेताको परिचय बनाएका संबिधान सभा अध्यक्ष नेम्वाङ पछिल्लो राष्ट्रपति निर्वाचनमा एमालेका तर्फबाट उम्मेदवार थिए ।