प्रधानमन्त्री केपी शर्मा ओलीले बिदेशमा रहेका नेपालीहरुको नागरिकताको निरन्तरताका लागि प्रतिवद्धता व्यक्त गरेका छन् । राष्ट्रसंघको महासभा बैठकलाई सम्बोधन गर्न न्यूयोर्क आईपुगेका बखत नेपालीहरुसँग कुराकानी गर्दै प्रधानमन्त्री ओलीले सबै अधिकार सहितको नागरिकता दिनका लागि आफु प्रतिवद्ध रहेको जानकारी दिएका हुन् ।

प्रधानमन्त्री ओलीले बिदेशमा रहँदा राजनीतिक अधिकार कटौती हुने तर अरु सबै अधिकार पाउने तथा यदी कुनै व्यक्ति नेपाल फर्केमा राजनीतिक अधिकार सहित सबै अधिकार प्राप्त हुने नागरिकताका लागि आफु सचेत रहेको उल्लेख गरे । प्रधानमन्त्री ओलीले हाल प्राप्त भएको गैरआवासीय नागरिकतालाई लौरो न हतियार भनेका छन् ।

मैले गैरआवासीय नागरिकता दिँदाका बखत पनि भनेको थिएँ, साथीहरु उत्साहित हुनु भयो तर त्यो बाँदरको पुच्छर लौरो न हतियार भने जस्तै हो । प्रधानमन्त्री ओलीले एक पटकको नेपाली सँधैको नेपाली हुनका लागि नागरिकताको निरन्तरता हुनुपर्नेमा जोड दिए ।

प्रधानमन्त्री ओलीले गैरआवासीय नागरिकतामा खुसी हुनेहरु प्रति लक्षित गर्दै भने, त्यो गैरआवासीय नेपाली भनेको त, नेपालप्रति माया नहुनेहरुको कुरा हो । प्रधानमन्त्री ओलीले गैरआवासीय नागरिकता भन्नेहरु आफुलाई नेपाली नागरिक भन्न नचाहनेहरुको कुरा हो भनेका छन् । प्रधानमन्त्री ओलीलाई बंशजका आधारमा प्राप्त नेपाली नागरिकताको निरन्तरता अभियानका अभियान्ता संजय थापाले विश्वभरबाट हस्ताक्षर अभियान चरिहेको समेत जानकारी दिएका छन् ।