अमेरिकाको टेक्सस राज्यस्थित ह्युस्टन सहरको एक कम्यूनिटी कलेजमा अध्ययनरत नेपाली छात्राको गोली हानेर हत्या गरिएको छ । हत्या बारे पूर्ण विवरण आउन भने बाँकी छ । स्थानिय प्रहरीले घटनाका बारेमा थप अनुसन्धान सुरु गरिएको जानकारी दिएको छ ।

मृतक नेपाली छात्रा मुना पाण्डे अध्ययनका लागि सन्, २०२१ मा अमेरिका आएको बताइएको छ । श्रोतका अनुसार मृतक विद्यार्थी मुना ह्युस्टन सहर नजिकैको अपार्टमेन्टमा बस्दै आएकी थिइन् । प्रहरीको प्रारम्भिक अनुसन्धान पश्चात शव पोष्टमार्टमका लागि अस्पतालमा राखिएको छ ।

सोमवार अपरान्ह अपार्टमेण्टको कोठाभित्र शव भएको जानकारी प्रहरीलाई दिइएको थियो । एसोसिएसन अफ ह्युस्टनका प्रथम उपाध्यक्ष द्रोण गौतमका अनुसार मृतकका परिवारलाई घटना बारे जानकारी दिईसकिएको छ । मृतककी आमा अनिता पाण्डे अधिकारीका अनुसार मुनाले चार दिन अघि फोनमा कुराकानी गरेकी थिईन् । मुना परिवारकी एक मात्र सन्तान थिईन् ।