विक्रम संवत्को पात्रोअनुसार आजदेखि नयाँ वर्ष शुरु भएको छ । हरेक वैशाख १ गते हुने नयाँ वर्षलाई नेपाली संस्कृतिमा विशेष दिनका रुपमा मनाइन्छ । विसं पात्रोअनुसार सौर्यमानक हिसाबले वैशाख १ गते नयाँ वर्ष मनाइन्छ भने चन्द्रमानक हिसाबले चैत्र शुक्ल प्रतिपदा तिथिका दिन नयाँ वर्ष मनाइन्छ । विसं हिन्दू पञ्चाङ्गमा आधारित भएर निर्माण गरिएको पात्रो मानिन्छ ।

नयाँ वर्षका अवसरमा आपसमा सद्भावका तथा आदानप्रदान गर्ने गरिन्छ । नयाँ वर्षको अघिल्लो साँझ साथीभाइ, इष्टमित्र भेटघाटसहित रमाइलो गरी वर्षान्त पनि मनाइन्छ । नयाँ वर्षमा धार्मिक आस्था राख्नेहरुले मठमन्दिरमा गई पूजाआजा गर्ने पनि गर्दछन् ।

विगतका कामको समीक्षा गर्दै कमजोरी सुधारेर नयाँ जोश र जाँगरका साथ आफ्नो कर्मक्षेत्रमा लाग्न नयाँ वर्षका अवसरमा प्रण पनि गर्ने गरिन्छ । यस अवसरमा राष्ट्रपति, प्रधानमन्त्री लगायत बिशिष्ट व्यक्तिहरुले समेत शुभकामना व्यक्त गरेका छन् ।

नयाँ बर्षका अवसरमा देशका बिभिन्न ठाँउमा साँस्कृतिक कार्यक्रम समेत गर्ने चलन छ । साथै बिदेशमा समेत नेपाली नयाँ बर्षका अवसरमा बिशेष कार्यक्रम गर्ने गरेको पाइन्छ । हामी हाम्रा सम्पूर्ण पाठक, श्रोता तथा शुभेच्छुकहरुमा नयाँ बर्षको अवसरमा हार्दिक मंगलमय शुभकामना व्यक्त गर्दछौं ।