नेकपा माओवादी केन्द्रले पार्टी केन्द्रीय कार्यालय पेरिसडाँडामा थप ८ आना जग्गा किनेको छ । माओवादीले हालै ५ करोड ७७ लाख २८ हजार ७ सय ५० रुपैयाँमा केन्द्रीय कार्यालयको मूलगेट बाहिरको ८ आना जग्गा खरिद गरेको पार्टीको आन्तरिक लेखा परीक्षण विवरणमा उल्लेख छ ।

माओवादी केन्द्रीय कार्यालका मुख्यसचिव तथा कोषाध्यक्ष श्रीराम ढकालले सांसद, पार्टी सदस्यको लेबीबाट जग्गा खरिद गरेको जानकारी दिएका छन । ‘मुख्यगरी लेबीको आम्दानीबाट जग्गा खरिद गरिएको हो,’ उनले भने । हाल पेरिसडाँडामा माओवादीको केन्द्रीय कार्यालय संचालन हुँदै आएको छ ।

माओवादीले जग्गा वरिष्ठ अधिवक्ता देवराज कटुवालबाट किनेको हो । यसअघि उनीबाटै १२ आना किनेको थियो । माओवादीले २०६५ सालमा २ रोपनी ८ आना जग्गा सहितको भवन राष्ट्रिय वाणिज्य बैंक केन्द्रीय कार्यालयले गरेको लिलामीबाट सकारेको थियो ।

कोषाध्यक्ष ढकालले केन्द्रीय कार्यालय साँघुरो हुँदै गएकाले जग्गा थपिएको जानकारी दिएका छन । ढकालले भने, आवश्यकताअनुसार जग्गा किनिएको हो,’। माओवादीले ०६५ मा भवन र जग्गा किनेपछि पेरिसडाँडाको नामले चर्चित छ । होटल संचालनका लागि बनाइएको भवनमा पार्टी, मजदुर संगठन, वाइसीएललगायत कार्यालय रहेका छन् । माओवादीले आगामी दिनमा ५ रोपनी जग्गामा अत्याधुनिक केन्द्रीय कार्यालय बनाउने योजना बनाएको छ ।

माओवादीले शान्ति प्रक्रियामा आएपछि नेताहरुले व्यक्तिगत सम्पत्ति जोड्न नहुने नीति बनाएको थियो ।