यस वर्ष दशैंको टीकाको उत्तम साइत बिहान ११ बजेर २ मिनेटमा छ । नेपाल पञ्चांग निर्णायक समितिले सार्वजनिक गरेको टीकाको साइत अनुसार, कात्तिक ७ गते बिहान ११ बजेर दुई मिनेटमा टीका लगाउँदा राम्रो छ ।

विजया दशमीका दिन बिहान १०ः३७ बजे देवी विसर्जनको साइत छ। देवी विसर्जन सकेपछि दुर्गाको प्रसाद ग्रहण गर्न दिनभर कुनै बाधा नभए पनि साइत खोज्नेहरुका लागि बिहान ११ बजेर २ मिनेटमा उत्तम साइत रहेको समितिले जनाएको छ।

गत साउन महिनामा अधिकमास परेका कारण यस वर्ष असोज अन्तिमदेखि दशैं सुरू भएको हो । कात्तिक ११ गते कोजाग्रत पूर्णिमा मनाएपछि १५ दिनमा दशैं पर्व समाप्त हुन्छ। मंगलबार विजया दशमी अर्थात् दुर्गापक्षको मुख्य दिन हो। नवदुर्गाको प्रसादका रूपमा मान्यजनको हातबाट शुभ साइतको प्रतीक रातो टीका एवं समृद्धिको प्रतीक जमरा लगाइन्छ।