काठमाडौं महानगरपालिका भित्रका सामुदायिक विद्यालय प्रधानाध्यापकहरूले शिक्षा विधेयक खारेजीको माग गर्दै आन्दोलनमा ऐक्यवद्धता जनाएका छन् । काठमाण्डौं महानगरभित्रका प्रधानाध्यापकहरूले बुधबार संयुक्त विज्ञप्ति मार्फत शिक्षा विधेयकको बिरोध गर्दै आन्दोलनमा साथ दिने तर विद्यार्थीलाई पुग्ने शैक्षिक क्षतिको परिपूर्ति गर्ने प्रतिवद्धता जनाएका छन् ।

विद्यालय शिक्षा सम्बन्धी कानूनलाई संशोधन र एकीकरण गर्न बनेको विधेयक २०८० को खारेजीका लागि नेपाल शिक्षक महासंघले काठमाडौं केन्द्रित आन्दोलन गरी देशभरीको विद्यालय अनिश्चित रूपमा बन्द गरी सशक्त आन्दोलनमा जाने सुरू गरेको कार्यक्रमहरूलाई समर्थन छ, विज्ञप्तिमा भनिएको छ ।

अर्को सूचना नआएसम्मका लागि काठमाडौं महानगरपालिकाका सम्पूर्ण सामुदायिक विद्यालयको प्रधानाध्यापकहरूको बैठकले माइतीघर मण्डलमा नियमित हाजिर हुने गरी सम्पूर्ण शिक्षक कर्मचारीहरू उपस्थित हुन अनुरोध समेत गरेका छन् । यसैबीच काठमाण्डौं महानगरका प्रमुख बालेन्द्र शाहले शिक्षा विधेयकमा असन्तुष्ट भएता पनि शिक्षकले स्कुल बन्द गरेर पठनपाठनमा अवरोध नपुर्याउन अनुरोध गरेका छन्।