प्रधानमन्त्री पुष्पकमल दाहालले दिगो बिकास लक्ष्य हाँसिल गर्न कठिन रहेको बताएका छन् । प्रधानमन्त्री दाहालले सन् २०३० भित्र लक्ष्य पुरा गर्न पूर्वाधार, खानेपानी र सरसफाइ, खाद्य सुरक्षा, स्वास्थ्य तथा शिक्षा क्षेत्रमा लगानीको अभावका कारण लक्ष्य हासिल गर्न कठिन रहेको बताएका हुन् ।

संयुक्त राष्ट्रसंघको ७८औं महासभा अन्तर्गत दिगो विकास लक्ष्यहरू (एसडीजी) लाई सम्बोधन गर्दै प्रधानमन्त्री दाहालले समयसीमा नजिकिँदै गर्दा कोरोना महामारी, जलवायु परिवर्तन र भूराजनीतिक कारणले दिगो विकासको लक्ष्य पुरा गर्न अप्ठ्यारो रहेको बताए ।

सोमवारको शत्रलाई सम्बोधन गर्दै, प्रधानमन्त्री दाहालले सन् २०११ को तुलनामा एलडीसी मुलुकको औषत बाह्य ऋण सन् २०२२ मा ४१ प्रतिशतबाट बढेर ५४ प्रतिशत पुगेको बताएका छन् । सोमबारको शत्रमा नेपालका तर्फबाट परराष्ट्रमन्त्री एनपी साउद, परराष्ट्र सचिव भरतराज पौड्याल, न्युयोर्कस्थित नेपालका लागि स्थायी नियोग प्रमुख लोकबहादुर थापा र प्रधानमन्त्रीकी स्वकीय सचिव गंगा दाहाल लगायतका सहभागि भएका छन् ।

राष्ट्रसंघको ७८ औं महासभामा सहभागिता जनाउन प्रधानमन्त्री दाहाल नेपाली प्रतिनिधिमण्डलको नेतृत्व गर्दै स्थानीय समयअनुसार आइतबार बिहान न्युयोर्क पुगेका छन् । प्रधानमन्त्री दाहालले राष्ट्रसंघका महासचिवलाई भेटि सकेका छन्, भने अमेरिकी राष्ट्रपति जो बाइडेनसँग भेटघाट गर्ने कार्यक्रम छ ।