प्रधानमन्त्री दाहाल र चिनिया राष्ट्रपति सीबीच शिष्टाचार भेटघाट हुने

न्यूजपाली संवाददाता शुक्रबार, २९ भाद्र २०८०

काठमाडौ । प्रधानमन्त्री पुष्पकमल दाहाल र चिनिया राष्ट्रपति सी जिङपिङ बीच शिष्टाचार भेटघाट हुने भएको छ । प्रधानमन्त्री दाहालले अमेरिका र चीन भ्रमणबारे संसदलाई जानकारी गराउँदै चिनियाँ राष्ट्रपति सीसँग भेट्ने कार्यसूची तय भएको बताएका छन् ।

आगामी असोज ५ गते अमेरिकाको न्ययोर्कबाट सिधै चीनको हाङचाओ जान लागेका प्रधानमन्त्री दाहाल र चिनिया राष्ट्रपति बीच असोज ६ गते शिष्टाचार भेटघाट हुनेछ । यस्तै चिनिया राष्ट्रपति सीसँगको भेटवार्तापछि प्रधानमन्त्री दाहाल एसियन गेम्समा सहभागी हुने कार्यक्रम छ ।

यस्तै प्रधानमन्त्री दाहाल र चिनिया समकक्षी ली चियाङसँग भेट हुने कार्यक्रम समेत समावेश छ । संसदमा बोल्दै प्रधानमन्त्री दाहालले समकक्षीसँगको भेटमा नेपाल र चीनबीच द्विपक्षीय सम्झौता हुने जानकारी गराएका छन् । प्रधानमन्त्री दाहालले नेपाल र चीनबीच लामो समयदेखि घनिस्ट सम्बन्ध रहेको उल्लेख गर्दै नेपाली जनताको हित र नेपाल चीन सम्बन्धलाई मजबुत बनाउने प्रयास आफुले गर्ने बताएका छन् ।