काठमाण्डौं

प्रधानमन्त्री पुष्पकमल दाहालले सुन प्रकरणमा जोडिएका पूर्वसभामुख कृष्णबहादुर महरामाथि अनुुसन्धान अघि बढ्ने बताएका छन् । प्रधानमन्त्री दाहालले पूर्वसभामुख महरा र उनका छोरा राहुल महराको नाम सुन प्रकरणमा जोडिएकाले अभियोजन अघि बढ्ने जानकारी दिएका छन् ।

प्रहरीको केन्द्रीय अनुसन्धान ब्युरो (सीआईबी)ले गरेको अनुसन्धानमा पूर्वसभामुख महरा र उनका छोराको पटक-पटक फोन सम्पर्क भएको देखिन्छ । प्रहरीको प्रतिवेदनमा उक्त कुरा उल्लेख भए पनि महरालाई मुद्दा चलाइएको छैन् । सुन प्रकरणमा महराको नाम जोडिएसँगै माओवादी केन्द्रका अध्यक्ष समेत रहेका प्रधानमन्त्री दाहालमाथि दबाब छ ।

तर राष्ट्रिय मिडियाले फ्रन्ट पेजमै नाम र सुन प्रकरणमा जोडिएकाहरुसँग सम्पर्क भएको समाचार लेख्दा समेत प्रहरीले उनीहरुलाई सामान्य सोधपुछका लागि समेत बोलाएको छैन् । प्रधानमन्त्री दाहालका अनुसार बिद्युतीय चुरोट (भेप)मा ल्याइएको नौ किलो तथा माओवादी केन्द्रका उपाध्यक्ष समेत रहेका महरा माथिको अभियोजन अघि बढ्नेछ ।

बालुवाटारमा पत्रकारहरुसँग कुराकानी गर्दै दाहालले भने, सायद अब अभियोजन अघि बढ्छ । प्रधानमन्त्री दाहालले सुन प्रकरणका बारेमा गृहमन्त्रीसहित सीआईबीसँग पनि जानकारी लिईरहेको जानकारी दिएका छन् । प्रतिवेदनमा महराको नाम कसरी आयो र नाम आएपछि किन अभियोजन गरिएन भनेर प्रहरीलाई आफूले सोधेको उल्लेख गरेका छन् ।