काठमाण्डौं

नेपाली कांग्रेसको संसदीय दलको बैठकमा बोल्ने सांसदहरूले गम्भीर भएर सुन प्रकरणमा उच्चस्तरीय छानबिन आवश्यक रहेको बताएका छन् । बैठकमा सहभागि भएर बोल्ने सांसदहरुले क्विन्टल सुन प्रकरणले नेपाल सुन तस्करीको ठूलो अखडा भइसकेको प्रष्ट हुने भन्दै क्विन्टल सुन तस्करीबारे उच्चस्तरीय छानबिन समिति बनाउनु पर्ने धारणा राखेका छन् ।

कोइराला समूहका नेताहरूले सुन तस्करी प्रकरणमा उच्चस्तरीय छानबिन समिति उपयुक्त हुनेमा जोड दिँदै आएका छन् । प्रमुख सत्तारुढ दल नेपाली कांग्रेसको आइतबार बसेको बैठकमा केही सांसदहरुले सुन प्रकरणबारे मत बाझिने धारणा समेत राखेको बताइन्छ । पार्टी सभापति शेरबहादुर देउवाले सुन प्रकरणमा प्रधानमन्त्री पुष्पकमल दाहाललाई साथ दिँदै आएका छन् । जारी बैठकमा पार्टी सभापति देउवा र दलका पदाधिकारीहरूले भने अहिले सम्म धारणा राखेका छैनन् ।

एमालेले समितिनै बनाएर छानबिन हुनुपर्ने माग गर्दै संसद् चल्न नदिने अडानमा अडिग छ । सांसदहरुले प्रधानमन्त्री पुष्पकमल दाहालले उच्चस्तरीय छानबिन समिति बनाउन तयार नभए कांग्रेसले सरकारलाई दिएको समर्थन फिर्ता लिन तयार हुनुपर्ने चेतावनी समेत दिएको बताइन्छ । बैठकमा कांग्रेस नेता शेखर कोइरालाले नेपाललाई सुन तस्करीको अखडाबाट मुक्त गर्न उच्चस्तरीय छानबिन समिति बनाउनुको विकल्प नभएको बताए ।