काठमाडौं

संसदीय दलको बैठक अघि नेपाली कांग्रेसका सभापति शेरबहादुर देउवाले भावी रणनीतिका बारेमा छलफल गरेका छन्। धुम्बाराहीस्थित निवासमा सभापति देउवाले उपसभापति पूर्णबहादुर खड्का र दुई महामन्त्रीसँग आन्तरिक छलफल गरेका हुन्।

बैठकमा प्रमुख सचेतक रमेश लेखकलगायत केही शिर्ष नेताहरु सहभागी रहेका थिए। सभापति देउवाले शुक्रबार दिउँसो संसदीय दलको बैठक बोलाएका छन्। नेताहरूबीच सुन तस्करी, नक्कली भुटानी शरणार्थी, ललिता निवास प्रकरण र सरकारका पछिल्ला काम कारबाहीबारे समेत छलफल भएको जानकारी दिईएको छ ।

संसदीय दलको बैठकमा उल्लेखित बिषयहरुमा छलफल हुने जानकारी दिईएको छ । तत्कालीन गृहमन्त्री एवं कांग्रेस नेता बालकृष्ण खाँण नक्कली भुटानी शरणार्थी प्रकरणमा अहिले जेलमा छन्। शुक्रबारको बैठकमा खाँणका बिषयमा समेत छलफल हुने स्रोतको भनार्इ छ। यद्यपि नेपाली कांग्रेसभित्र खाँणलाई कारबाही गर्ने वा नगर्नेबारे प्रष्ट दुई धार छ।

यसैगरी प्रहरीको केन्द्रीय अनुसन्धान व्युरो सिआईबीले पक्राउ गरेका कांग्रेसका सांसद सुनिल शर्माका विषयमा समेत संसदीय दलको बैठकमा छलफल हुने छ।