काठमाण्डौं

नेकपा एमालेले सुन तस्करी प्रकरणको छानविनको माग गर्दै लगातार संसद अवरोध  गरिरहेको छ । बुधबार प्रतिनिधि सभाको बैठक शुरू हुने बित्तिकै एमाले सांसदहरुले विरोध जनाएका हुन्। एमालेले १ सय किलो सुन तस्करी प्रकरणको छानबिनका लागि उच्चस्तरीय छानबिन समिति गठन गर्न माग गर्दै संसदमा बिरोध जनाउँदै आएको छ ।

सभामुख देवराज घिमिरले प्रतिनिधि सभाको बैठक सञ्चालन गर्न खोजेपछि एमाले सांसदहरुले रोस्टम घेराउ गरेका थिए । एमाले सांसदहरुले नाराबाजी गर्न थालेपछि सभामुख घिमिरले बैठक स्थगन भएको घोषणा गरे। अब प्रतिनिधि सभाको अर्को बैठक साउन २६ गते दिउँसो १ बजेका लागि बोलाइएको छ।

यता नेपाल प्रहरीको केन्द्रीय अनुसन्धान ब्यूरो (सीआईबी)ले अनुसन्धान गरिरहेकाले उच्चस्तरीय छानबिन समिति आवश्यक नपर्ने सरकारको भनाई छ। हङकङबाट आएको करीब १०० किलो सुन साउन ३ गते त्रिभुवन अन्तर्राष्ट्रिय विमानस्थलबाट जाँच पास भएर निस्केपछि राजस्व अनुसन्धान विभागको टोलीले नियन्त्रणमा लिएको थियो। अनुसन्धानका क्रममा अहिलेसम्म १८ जना पक्राउ परिसकेका छन्। विभागले थप अनुसन्धानको जिम्मा सीआईबीलाईनै दिएको छ।