पोखरा, १८ जेठ । कास्कीमा कोभिड १९ विरुद्वको दोस्रो मात्राको खोप लगाउने कार्यक्रम जारी रहेको छ ।

स्वास्थ्य कार्यालय कास्कीका प्रमुख बाबुराम आचार्यले आइतबार सूचना प्रकाशित गरी जेठ १८ र १९ गते दोस्रो मात्राको खोप लगाउने कार्यक्रम तय गरिएको जनाउनु भएको छ ।

कोभिड १९ विरुद्व भेरोसिल पहिलो मात्रा लगाएकालाई मात्र दोस्रो मात्राको खोप लगाइने छ । खोप लगाउनका लागि पहिलो मात्राको भेरोसिल खोप लगाएको कार्ड र जनस्वास्थ्यका मापदण्ड पूरा गरी स्वास्थ्य कार्यालय कास्कीमा सम्पर्क गर्न अनुरोध गरिएको छ ।

तोकिएको दिनमा बिहान १० देखि दिउँसो ३ बजेसम्म खोप लगाउन सकिने स्वास्थ्य कार्यालय कास्कीले जनाएको छ ।
यसअघि काठमाण्डौंमा भेरोसिल खोपको पहिलो मात्रा लगाएका तर निषेधाज्ञाका कारण फर्कन नसकेकाहरुका लागि मात्र यो खोप लगाइने प्रमुख आचार्यको भनाइ छ ।

स्वास्थ्य कार्यालय कास्कीको तथ्यांक अनुसार, कास्कीमा भेरोसिल खोपको दोस्रो मात्रा लगाउनेको संख्या करीब चार सय छ ।

फागुन २३ गते अघि पहिलो प्राथमिकतामा परेर कोभिड १९ विरुद्वको कोभिशिल्ड खोप लगाएका स्वास्थ्यकर्मी, सुरक्षाकर्मी र सरसफाईकर्मीलाई जेठ १३ र १४ गते पोखरामा दोस्रो मात्राको खोप दिइएको थियो ।

दुई दिनमा सात सय ९३ जनालाई कोभिशिल्ड खोप लगाइएको थियो ।