पोखरा, ११ मंसिर । नेपाल स्वास्थ्यकर्मी संघ गण्डकी प्रदेशको प्रथम अधिवेशन मंशिर १४ गते शुक्रबार पोखरामा हुने भएको छ ।

‘नागरिकको स्वास्थ्यमा सहज पहुँच, मर्यादीत पेशामा सुरक्षित स्वास्थ्यकर्मी’ भन्ने मूल नाराका साथ हुन लागेको अधिवेशन पोखरा स्वास्थ्य विज्ञान प्रतिष्ठानको सभाहलमा हुने छ । अधिवेशनले २१ सदस्यीय प्रदेश कार्यसमिति गठन गर्ने छ ।

अधिवेशनमा ११ जिल्लाका एक सय १० भन्दा बढी प्रतिनिधि र पर्यवेक्षक सहभागि हुने छन् । अधिवेशनलाई लक्षित गरी मङ्गलबार तयारी बैठक सम्पन्न भएको छ ।

अधिवेशनको आवश्यक तयारी तिव्र पारिएको छ, संघका अध्यक्ष नारायण बरालले भने – ‘स्वास्थ्य क्षेत्रको सुदृढिकरण तथा पेशागत हक, हितका लागि अधिवेशनले महत्वपूर्ण निर्णय समेत गर्ने छ।’ उनले अधिवेशनलाई सफल बनाउनका लागि सहयोग गर्न आग्रह गरे ।

नेपाली काँग्रेसका बरिष्ठ नेता रामचन्द्र पौडेलले अधिवेशन उद्घाटन गर्ने छन् ।